زليمخان يعقوبدان بير قوْشما
ايران توٍركوسو و آذربايجان ادبيّاتيندا اَن چوْخ سئويلن شعر فوْرماسي قوْشمادير. اوْنبير اؤلچولو اوْلان بو شعر نؤوعونون هر ميصراعي 5 + 6و يا 3 + 4 + 4 بؤلگولرينده قوُرولار. عوموميّتله اوٍچ و يا بئش بند اوْلار. هر بندده ايلك اوٍچ ميصراع بير قافيهده و بوٍتون دؤردونجو ميصراعلار ثابيت قافيهده اوْلارلار. بعضي قوْشمالاردا قوْشابئيت فوْرماسيندا يازيلار. يعني بيرينجي ميصراع، اوٍچونجو و ايكينجي ميصراع، دؤردونجو ميصراع ايله همقافيه اوْلار.
قوْشما، آشيق ادبيّاتينين اَن يايغين شعر فوْرماسيدير. بوٍتون آشيقلار، قوْشما يازميشلار. شهريارين حيدرباباسيدا قوْشما فوْرموندا يازيلميشدير.
يارادان هئچ نهيي تك ياراتماييب،
چمني بولاقلا قوْشالاشديريب.
ايلهامي شعرينن، اوٍرگي سؤزونن،
نغمهني دوْداقلا قوْشالاشديريب.
يئرلشمير اوْتاغا، سيغيشمير ائوه،
باخيرسان ساچلاري قاب قارا شوه،
بابانين يانيندا داريخمير نوه،
قوْجاني اوشاقلا قوْشالاشديريب.
دوٍنيانين حئسابي يازيلماليايميش،
سئوينجي، عذابي يازيلماليايميش،
تاريخين كيتابي يازيلماليايميش،
قلمي واراقلا قوْشالاشديريب.
حياتا جان وئرير قلبين سسلري،
دوٍنيا اونوتماييب دويان كسلري،
اوٍركده ياشايان موٍقدّسلري،
آليشان اوْجاقلا قوْشالاشديريب.
زليمخان يوردومدو بو دوْغما دييار،
بوردا بئششگيمده، مزاريمدا وار،
دوٍنيانين اؤزودور بؤيوك صنعتكار،
اينساني توْرپاقلا قوْشالاشديريب.
